اے نیند گھڑی پل مجھے آرام تو دے جا

قسمت میں ستارہ نہ سہی شام تو دے جا
اے موج ِ ہوا  پھر کوئ پیغام تو  دے  جا
سانسوں نے اگر ساتھ میرا چھوڑ دیا تو
آنکھوں کے چراغوں کو درو بام تو دے جا
ٹھہرے ہوئے پانی میں گرا جا کوئی کنکر
خاموش ندی کو کوئی  پیغام  تو دے جا
کشکول میں خوشیوں کی اگر بھیک نہیں دی
جینے کو یہ رنج و غم و آلام تو دے جا
احساس کی ڈوری میں مجھے باندھنے والے
بے نام سے رشتے کو کوئی نام تو دے جا
گزرے ہوئے لمحوں کے پھٹے چاک سیئیں کیا
اس ہجر میں آنکھوں کو کوئی کام تو دے جا
یہ زیست کا افسانہ ادھورا ہے ابھی تک
اس زیست کے افسانے کو انجام تو دے جا
اے خواب ِ وصال آ میری آنکھوں میں ٹھہر جا
اے نیند گھڑی پل مجھے آرام تو دے جا